,,Við spiluðum frekar illa og gerðum ansi margar vitleysur, ótrúlegar ákvarðanatökur og margar ótrúlega slakar sendingar. Þetta var mjög dapurt," sagði Kristján Guðmundsson þjálfari Keflavíkur eftir 0- 2 tap gegn FH í Kaplakrikanum í kvöld.
Lestu um leikinn: FH 2 - 0 Keflavík
,,Það er erfitt að finna eina skýringu á þessu núna en við vorum að spila á móti góðu liði. Það er ekkert hægt að taka að frá þeim. En erfitt að setja fingurinn á það akkúrat núna."
Keflavík spilaði bikarúrslitaleik sem þeir töpuðu gegn KR á laugardaginn, hafði það áhrif?
,,Bikarúrslitaleikurinn hafði einhver áhrif en það var orka í okkur. Við vorum ekkert að leggjast til baka og vorum að hlaupa. við þrýstum á þá en það vantaði eitthvað upp á einbeitinguna. Tækniatriðin voru slök en orkan var til staðar."
,,Við vildum þrýsta á þá og koma í veg fyrir að þeir næðu miklum rhythma í sínum leik og halda áfram að vera með hröðu sóknirnar okkar. Það gekk bara afskaplega illa upp og sérstaklega því sendingarnar okkar rötuðu ekki á samherja. Þegar við áttum færi á að sækja vorum við of mikið að rekja boltann til baka. Þeir leikmenn sem hafa getu til að rekja boltann eða sækja á markið gerðu það ekki. Við tókum tæknilega of margar rangar ákvarðanir."
