Liverpool, sem varð Englandsmeistari á síðasta tímabili, verður í Meistaradeildinni á næstu leiktíð eftir erfitt tímabil. Liverpool tókst að landa 2-0 sigri gegn Crystal Palace eftir brösuga byrjun. Sadio Mane skoraði bæði mörkin í lokaleik Roy Hodgson sem knattspyrnustjóra.

Jurgen Klopp, stjóri Liverpool, vildi ekki útiloka það fyrir leikinn í dag að Georginio Wijnaldum myndi vera áfram hjá félaginu. Eftir leikinn í dag var það hins vegar gert nokkuð augljóst að Hollendingurinn er á förum.

Hann fékk heiðursvörð eftir leikinn en samningur Wijnaldum er að renna út. Hann hefur verið orðaður við Barcelona.

Wijnaldum spilaði stóra rullu í sigri Liverpool í Meistaradeildinni 2019 og Englandsmeistaratitlinum í fyrra.

Graham Carter, búningastjóri Liverpool, fékk einnig heiðursvörð. Hann er að kveðja félagið eftir 35 ára starf fyrir það.