,,Við skitum í buxurnar í dag og áttum alls ekki góðan dag," sagði Jörundur Áki Sveinsson þjálfari BÍ/Bolungarvíkur eftir 6-1 tap liðsins gegn Grindavík í fyrstu deildinni í dag.
Magnús Björgvinsson lék BÍ/Bolungarvík grátt með hraða sínum í dag. Vestfirðingar voru hátt með varnarlínuna en Jörundur vill ekki meina að það hafi verið mistök.
,,Nei, nei, ekki ef við hefðum náð að setja almennilega pressu á boltann. Það var það sem við lögðum upp með. Við vitum að þeir eru hættulegir ef þeir fá tímann á boltann."
Sigurgeir Sveinn Gíslason og markvörðurinn Alejandro Munoz fengu báðir að líta rauða spjaldið fyrir að brjóta á Magnúsi þegar hann var að sleppa í gegn.
,,Mér fannst fyrra spjaldið vera réttur dómur en seinna spjaldið var örlítið meira vafamál. Dómarinn verður bara að svara fyrir sig."
Andri Rúnar Bjarnason, framherji BÍ/Bolungarvíkur, fór í markið þegar að Alejandro fékk rauða spjaldið.
,,Hann óskaði eftir því að fara í markið. Ég var nýbúinn að gera þriðju skiptinguna og var í smá vandræðum en hann tók þetta á sig."
BÍ/Bolungarvík er með sex stig eftir þrjár umferðir og þrátt fyrir tap í dag þá horfir Jörundur Áki björtum augum á framhaldið.
,,Við lærum af þessu og vonandi komum við sterkir til baka. Við eigum leik við Reyni Sandgerði í bikarnum í vikunni og síðan leik gegn Selfossi heima á mánudaginn. Við þurfum að nýta vikuna vel og fara yfir það sem fór úrskeiðis í þessum leik."
Hér að ofan má sjá viðtalið í heild sinni.
