Meistaradeildin: Stefán Ingi skoraði þegar Blikar völtuðu yfir Tre Penne

Tre Penne frá San Marínó var lítil fyrirstaða fyrir Breiðablik í forkeppni Meistaradeildarinnar í kvöld.

Blikar voru með nokkra yfirburði í fyrri hálfleik en Höskuldur Gunnlaugsson kom liðinu yfir snemma leiks. Ágúst Hlynsson tvöfaldaði forystuna.

Tre Penne komst í sína fyrstu alvöru sókn stuttu síðar og náðu að minnka muninn eftir sofandahátt í vörn Blika. Það var hins vegar Klæmint Olsen sem skoraði þriðja markið í uppbótartíma og 3-1 er staðan í hálfleik.

Stefán Ingi Sigurðarson byrjaði á bekknum í kvöld en kom inn á eftir rúmlega klukkutíma leik og var ekki lengi að setja mark sitt á leikinn og skoraði fjórða mark liðsins. Hann setti boltann aftur í netið stuttu síðar en Höskuldur var dæmdur rangstæður í aðdragandanum.

Blikar voru alls ekki hættir og skoruðu þrjú mörk í viðbót og gersamlega völtuðu yfir Tre Penne.

Breiðablik mætir Buducnost í úrslitum á Kópavosgvelli á föstudaginn í leik um sæti í undankeppni Meistaradeildarinnar.

Liðin þekkjast ágætlega þar sem þau mættust í fyrra í hörku viðureign. Óljóst er hvort Stefán Ingi verði með þar sem hann virðist vera á förum frá Breiðabliki.