Championship: Burnley heldur toppsætinu eftir tapleik QPR

Birmingham fékk QPR í heimsókn í fyrsta leik helgarinnar í Championship deildinni á Englandi.

QPR gat endurheimt toppsæti deildarinnar af Jóhanni Berg Guðmundssyni og félögum í Burnley með sigri en Auston Trusty kom heimamönnum í Birmingham yfir strax á fjórðu mínútu.

Emmanuel Longelo tvöfaldaði forystu heimamanna og var staðan 2-0 í leikhlé.

QPR lagði allt í sóknina í seinni hálfleik en tókst ekki að setja boltann í netið. Trusty átti frábæran leik í hjarta varnarinnar hjá Birmingham og var valinn besti leikmaður vallarins. Þá var John Ruddy flottur í markinu og varði vítaspyrnu á 78. mínútu.

Lokatölur 2-0 og er QPR í öðru sæti á meðan Birmingham er aðeins þremur stigum frá umspilssæti, með 23 stig eftir 17 umferðir.

Trusty er 24 ára bandarískur miðvörður á láni hjá Birmingham frá Arsenal.

Sjáðu markvörslu Ruddy