,,Þetta byrjaði alls ekki nógu vel. Ég sagði við þá í hálfleik að mér fannst þeir persónulega ekki bera neina virðingu fyrir þeim. Leikurinn byrjaði að snúast í höndunum á okkur en sem betur fer náðum við að koma til baka," sagði Ejub Purisevic þjálfari Víkings frá Ólafsvík eftir nauman 2-1 sigur á 4.deildarliði Álftaness í Borgunarbikarnum í kvöld.
Mate Dujilo, varnarmaður Víkings, fékk að líta rauða spjaldið undir lok fyrri hálfleiks fyrir að brjóta á Magnúsi Ársælssyni sem var að sleppa í gegn.
,,Ég ætla einfaldlega að treysta dómaranum. Þegar þú býður upp á svona þá er ekkert hægt að kvarta yfir því. Ég trúi því að þetta hafi verið rétt hjá dómaranum, bæði vítið og rauða spjaldið."
Næsti leikur Ólafsvíkinga er gegn Breiðabliki í Pepsi-deildinni þann 10. júní og því fær liðið kærkomna hvíld núna.
,,Á morgun er æfing svo gef ég smá frí. Við erum búnir að spila rosalega lengi á sama mannskap. Við byrjum á fríi og síðan kemur þetta í ljós," sagði Ejub.
Hér að ofan má sjá viðtalið í heild sinni.
