Heimild: Vísir 

„Jæja strák­ar, núna er búið að segja upp minnsta hlut­an­um af vandamálinu, stjórn KSÍ. Vanda­málið ligg­ur þó ekki þar, vanda­málið á stór­an upp­runa í þess­ari 'tox­ic' menn­ingu sem við höf­um all­ir al­ist upp í sem íþróttamenn, hvort sem áhuga- eða at­vinnu­menn,“ skrifaði Garðar.

„Við höf­um tæki­færi núna til þess að breyta þess­ari menn­ingu og sjá til þess að ung­ir iðkend­ur al­ist upp í heil­brigðara um­hverfi þar sem kvenfyrirlitning og mis­mun­un gagn­vart minni­hluta­hóp­um heyri sög­unni til.“

Hann segir að þetta muni taka tíma en að fótboltastrákar eigi að grípa tækifærið . „Þetta er ekki overnight breyting, þetta mun taka tíma en látum þetta byrja hjá okkur! Verum fyrirmyndir! Íþrótta­hreyf­ing­in þarf að fara í nafla­skoðun og ráðast á rót vand­ans, það þýðir ekki bara að snyrta topp­inn af trénu, meiri fræðsla til iðkenda og meiri þjálf­un leiðbein­enda er lág­marks­krafa," segir Garðar að lokum.

Þetta er ekki í fyrsta sinn sem Garðar lætur í sér heyra því hann gerði það einnig í #metoo byltingunni í vor. Þar lýsti hann yfir stuðningi við þolendur og sagði óafsakanlegt hversu blindir karlmenn hefðu verið gagnvart vandamálinu. Þá hvatti hann stráka til að uppræta þá eitruðu klefastemningu sem viðgengst í fótboltanum, líkt og hann gerði aftur í gær.

Garðar spilar með Kára í 2. deildinni en á sínum ferli sem atvinnumaður lék hann í Skotlandi, Svíþjóð, Búlgaríu, Austurríki og Þýskalandi. Garðar lék á sínum tíma einn A-landsleik. Á Íslandi hefur hann leikið með ÍA, Val og Kára.