Sjóðheitur.
„Við spiluðum virkilega vel í dag. Við lögðum leikinn þannig upp að þetta myndi skera á milli hvort við ætluðum að vera í efri hlutanum eða sogast í einhverja botnbaráttu," sagði Björgvin Stefánsson, helsti markaskorari Hauka, eftir 5-0 sigur á Leikni F. á Gaman Ferða vellinum að Ásvöllum í dag.
Lestu um leikinn: Haukar 5 - 0 Leiknir F.
„Mér fannst við sýna það í dag að við ætluðum að vera í efri hlutanum," sagði hann enn fremur.
Björgvin, sem skoraði þrennu í leiknum, var búinn að koma Haukunum yfir eftir 22 sekúndur.
„Þetta kom skemmtilega á óvart, sérstaklega þar sem þeir byrjuðu með boltann. Það var mjög þægilegt að byrja svona."
Nú eru mikilvægir leikir framundan fyrir Hauka.
„Það er mikilvægt fyrir okkur að hafa unnið þennan leik. Það gefur okkur hvatningu fyrir næstu leiki, að geta komið okkur ennþá ofar," sagði þessi öflugi sóknarmaður.
Björgvin er víst búinn að breyta matarræðinu hjá sér.
„Ég er búinn að vera vegan í heila þrjá sólarhringa og ég myndi segja að það væri ástæðan fyrir þrennunni í dag" sagði hann.
Viðtalið má sjá í heild sinni hér að ofan.
Athugasemdir
