HK fagnar sigri á síðasta tímabili.
Örvar Eggertsson.
Það eru flest allir með HK í neðsta sæti þegar spáð er í Bestu deildina sem framundan er. Og það er skiljanlegt þegar horft er í leikmannamarkaðinn. HK hefur aðeins fengið tvo leikmenn inn og liðið er ekki sterkara á pappír en það var í fyrra.
„Við eigum hreinlega ekki efni á því að skjóta mikið framhjá á leikmannamarkaðnum, né heldur að fylla hópinn af einhverjum mönnum sem eru ekki byrjunarliðsmenn," sagði Ómar Ingi Guðmundsson, þjálfari HK, í viðtali við Fótbolta.net í janúar en nokkuð hefur verið fjallað um fjárhagsstöðu HK núna í vetur.
Íþróttafréttamennirnir Andri Már Eggertsson og Ingvi Þór Sæmundsson eru báðir stuðningsmenn HK en þeir ræddu aðeins um stöðuna á liðinu í hlaðvarpi hér á síðunni í síðustu viku.
„Það var ljóst í fyrra - miðað við hvernig síðasta tímabil endaði - að það þyrfti að styrkja liðið. Það er veikara en í fyrra. Við erum því miður í stórum mínus á leikmannamarkaðnum eins og staðan er núna. Maður veit ekki hvort það komi frekari styrkingar korteri í mót. En það er ekki vanþörf á því."
Þeir búast við því að HK skoði lánsmarkaðinn þegar deildin fer af stað.
„Þeir munu örugglega horfa í það þegar mótið er komið af stað hverjir eru í frystiklefanum hjá hinum liðunum," sagði Ingvi.
Á meðal leikmanna sem eru farnir er Örvar Eggertsson, sem var besti leikmaður HK í fyrra.
„Hann gjörsamlega sprakk út. Hann hefur alltaf verið mikill íþróttamaður en allt í einu í fyrra sprakk hann út sem alvöru sóknarvopn," sagði Ingvi. „Það sem Örvar kom með í HK var að hann var sá leikmaður sem önnur lið þurftu að pæla mikið í og þurfti að hafa mikið fyrir. Það skipti gríðarlega miklu máli."
Athugasemdir
