Amorim vildi taka við United eftir tímabilið - „Þeir sögðu núna eða aldrei“

„Manchester var liðið sem ég vildi á eftir Sporting. Á tímapunkti þarf ég að taka skref fram á við. Þetta var erfið ákvörðun. United sagði við mig að ef ég myndi hafna félaginu núna þá fengi ég ekki starfið eftir sex mánuði. Ég vissi að ég myndi yfirgefa Sporting eftir sex mánuði."

„Ég vildi ekki sjá eftir því að hafa ekki tekið þessa ákvörðun. Ég veit að þetta er erfitt fyrir stuðningsmenn Sporting en ég fer ánægðari heim eftir að hafa getað útskýrt þetta. Ég hef gefið allt sem ég á til Sporting. Ég elska félagið, fólkið, starfsliðið... en ég þurfti að taka ákvörðun."

„Átti ég að vera áfram eða fara? Mín ákvörðun var að fara því mér var sagt að það væri nú eða aldrei."

Mun ekki sækja neinn leikmann frá Sporting í janúar
Amorim mun taka fimm aðstoðarmenn sína með sér frá Sporting til United. Vangaveltur hafa verið um það hvort Amorim gæti sótt einhverja leikmenn einnig og þá hefur helst verið talað um sænska sóknarmanninn eftirsótta Victor Gyökeres.

„Gyökeres er með 100 milljóna evra verðmiða og það yrði mjög erfitt. Ég er ekki að fara að sækja neina leikmenn frá Sporting í janúar," segir Amorim.

Amorim á eftir að stýra Sporting í tveimur leikjum til viðbótar áður en hann heldur til Manchester, í Meistaradeildarleik gegn Manchester City og svo gegn Braga í portúgölsku deildinni.