Þýskaland: Frankfurt skoraði fjögur gegn Leipzig

Nokkuð óvænt úrslit litu dagsins ljós í lokaleik dagsins í þýska boltanum þar sem Eintracht Frankfurt tók á móti RB Leipzig í stórslag.

Heimamenn í Evrópudeildarmeistaraliði Frankfurt voru mun betri aðilinn í dag og fóru inn í leikhlé með tveggja marka forystu eftir nokkuð tíðindalítinn fyrri hálfleik.

Það var í seinni hálfleik sem Frankfurt skipti um gír og bættu Tuta og Rafael Borre mörkum við í 4-0 sigri. Heimamenn hefðu getað unnið leikinn stærra á meðan gestirnir frá Leipzig áttu ekki nema fjórar marktilraunir og hæfði engin þeirra markrammann.

Randal Kolo Muani, sem var keyptur frá Nantes í sumar, var besti maður vallarins. Hann hefur byrjað þýska deildartímabilið frábærlega og lagði fyrstu tvö mörk leiksins upp í dag. Hann er þá kominn með tvö mörk og fimm stoðsendingar í sex leikjum á tímabilinu.

Christopher Nkunku og Timo Werner leiddu sóknarlínu Leipzig en þeir fengu enga þjónustu. Andre Silva kom inn af bekknum en ekki batnaði þjónustan.

Hvorugt lið hefur farið vel af stað á nýju tímabili í þýsku deildinni og er Frankfurt með 8 stig eftir 5 umferðir á meðan Leipzig er aðeins með 5 stig.