„Geðveikt á fá sigur, sigurinn nærir og bara frábært að vera kominn," sagði Samúel Kári Friðjónsson nýjasti leikmaður Vals eftir 3-0 sigur gegn FH í kvöld.
Lestu um leikinn: Valur 3 - 0 FH
Samúel byrjaði á bekknum og kom inn á í seinni þegar staðan var þegar 3-0. Hann segist spenntur fyrir því að koma inn í svona sterkt lið.
„Eins og sást, þá byrjum við af krafti frá fyrstu mínútu, skorum þrjú mörk og nýttum okkur það sem var opið. Svo var það bara númer eitt, tvö og þrjú að halda hreinu í 90 mínútur. Það nærir líka hvað mest," sagði Samúel.
Ýmsar sögusagnir hafa verið í kringum félagaskipti Samúels, en eitt af þeim er að hann hafi verið ósáttur í Stjörnunni, og þá sérstaklega við að vera spilaður út úr stöðu.
„Eina sem ég get sagt er að ég er kominn í Val og stundum er það bara þannig að menn eru mis sammála með hluti. Þegar öllu er á botninn er hvolft verður maður líka að hugsa um sjálfan sig, allt er í góðu og allir sáttir með þessa niðurstöðu. Sérstaklega ég," sagði Samúel.
