Íslendingaliðið Halmstad vann 4-2 heimasigur í sænsku úrvalsdeildinni gegn Varnamo þar sem Gísli Eyjólfsson kom inn á sem varamaður. Gísli hefur komið við sögu í öllum leikjum Halstad á tímabilinu til þessa. Birnir Snær Ingason varð hins vegar að gera sér það að góðu að sitja á bekknum allan tímann en það var í þriðja sinn í síðustu sex leikjum sem Birnir kemur ekkert við sögu.

Halmstad kom sér með sigrinu upp úr fallsæti, liðið er með sjö stig eftir sjö leiki.

Í Króatíu voru okkar menn, Logi Hrafn Róbertsson og Danijel Dejan Djuric, báðir ónotaðir varamenn þegar Istra gerði jafntefli við Lokomotiva Zagreb. Þetta var þriðji leikurinn í röð sem Logi Hrafn kemur ekkert við sögu og sá fjórði í röð hjá Danijel. Logi kom frá FH í janúar og Danijel var keyptur frá Víkingi í febrúar.

Istra er í 6. sæti deildarinnar og hefur að litlu að keppa í síðustu þremur leikjunum. Liðið á ekki möguleika á Evrópusæti og getur ekki fallið.

Í Bandaríkjunum kom Dagur Dan Þórhallsson inn á sem varamaður þegar Orlando City gerði markalaust jafntefli við Chicago Fire í MLS deildinni. Orlando er í 7. sæti Austurdeildarinnar sem stendur. Dagur hefur ekki spilað mikið í síðustu tveimur leikjum en var í byrjunarliðinu í þremur leikjum þar á undan.