Jurrien Timber, varnarmaður Arsenal, gæti misst af seinni leik liðsins gegn Paris Saint-Germain í undanúrslitum Meistaradeildar Evrópu á miðvikudag, en þetta sagði Mikel Arteta, stjóri félagsins, á blaðamannafundi í gær.
Timber byrjaði í hægri bakverðinum í fyrri leiknum gegn PSG en var ekki með Arsenal í 2-1 tapinu gegn Bournemouth í ensku úrvalsdeildinni í gær.
Eftir leikinn sagði Arteta að staða Timber væri óljós fyrir Meistaradeildarleikinn en Ben White byrjaði í stað hans í gær og gæti farið svo að hann fái tækifærið gegn PSG.
„Er ég bjartsýnn? Í augnablikinu er ég það ekki því hann var ekki klár í að spila í í gær og við eigum leik eftir þrjá daga,“ sagði Arteta.
Blaðamenn héldu áfram að spyrja Arteta út í Timber en hann sagðist ekki geta tjáð þeim frekari upplýsingar um stöðu hollenska varnarmannsins.
Arsenal er 1-0 undir í einvíginu og þarf að ná í hagstæð úrslit í Frakklandi til að komast í úrslit í fyrsta sinn síðan 2006.
Athugasemdir
