Elísa Viðarsdóttir fyrirliði Vals (th)
Valur þurfti að gera sér að góðu að lúta í gras er liðið mætti Stjörnunni á Samsungvellinum er liðin mættust í fjórðu umferð Bestu deildar kvenna í dag. Lokatölur 1-0 og fyrsta tap og fyrsta markið sem Valur fær á sig í mótinu staðreynd. Fyrirliði Valskvenna Elísa Viðarsdóttir var til viðtals við Fótbolta.net að leik loknum og sagði um hvað hefði misfarist í leik Vals í dag.
Lestu um leikinn: Stjarnan 1 - 0 Valur
„Mér fannst margt ekki alveg í lagi í okkar leik í dag. Við vorum soft í návígjum og þær voru bara miklu sterkari en við á öllum sviðum. Þær skora þetta eina mark úr föstu leikatriði þar sem við erum steinsofandi og það sker úr um leikinn.“
Leikurinn var hægur og tíðindalítill framan af og var tilfinning fréttaritara að lið Stjörnunar væri að stýra hraða leiksins. Eitthvað sem hélt áfram eftir að Stjarnan náði forystunni. Fannst Elísu Stjarnan ná að draga hraða Valsliðsins niður og hægja á leiknum?
„Ég veit það ekki, Mér fannst að þegar við náðum að spila inn á miðjuna og út í breiddina og keyra á þær við ná góðum upphlaupum inn á milli. En þær voru bara klókar, voru þéttar og var gríðarlega erfitt að brjóta þær niður.“
Að Stjarnan leggi Val er að mörgu leyti saga til næsta bæjar eins og Besta deild kvenna hefur verið síðastliðin ár. Úrslitin í deildinni til þessa hafa mörg hver verið óvænt og ekkert gefið fyrirfram. Metur Elísa það svo að deildin sé jafnari en nokkru sinni fyrr?
„Já ég held að það gefi auga leið. Hvernig mótið hefur spilast fyrstu leikina þá sjáum við að það eru allir að hirða stig af öllum. Nú er þetta spilað svolítið þétt fram að EM og aftur eftir EM þannig að það er líka spurning um það hvernig hóparnir haldast heilir hjá liðunum.“
Sagði Elísa en allt viðtalið við hana má sjá í spilaranum hér að ofan
Athugasemdir
