Tíu leikmenn sem augu verða á í Lengjudeildinni

Guðjón Pétur Lýðsson (ÍBV) - Er í raun alltof góður til að vera í Lengjudeildinni. Verið frábær í efstu deild síðustu tíu ár. Tekur skrefið niður til að hjálpa ÍBV að komast aftur upp í efstu deild.

Eiður Aron Sigurbjörnsson (ÍBV) - Sama saga og með Guðjón Pétur; alltof góður til að vera í Lengjudeildinni. Verið einn af bestu miðvörður efstu deildar síðustu ár, ef ekki sá besti.

Pétur Theódór Árnason (Grótta) - Var algjörlega frábær síðast þegar hann var í Lengjudeildinni 2019. Fann ekki alveg markaskóna í fyrra í efstu deild en síðast þegar hann spilaði í þessari deild þá skoraði hann 15 mörk í 22 leikjum.

Jóhann Árni Gunnarsson (Fjölnir) - Mjög spennandi leikmaður sem fékk smjörþefinn af efstu deild í fyrra. Verður í stóru hlutverki hjá Fjölni í sumar.

Conner Rennison (Kórdrengir) - Spennandi leikmaður sem er kominn til Íslands til að fá mínútur eftir erfið meiðsli. Vakti athygli félaga á borð við Newcastle og Leeds úti í Englandi. Hann er hér lengst til hægri á myndinni en það verður gaman að fylgjast með öllum þremur Bretunum í liði Kórdrengja.

Nacho Gil (Vestri) - Var stórkostlegur fyrir Vestra í fyrra og komst í lið ársins. Núna er hann kominn með meiri gæði í kringum sig á miðjunni. Skemmtilegur Spánverji.

Fred Saraiva (Fram) - Stórgóður á síðustu leiktíð þegar Fram barðist um að fara upp. Hrikalega skemmtilegur leikmaður sem litar deildina með miklum hæfileikum.

Dion Acoff (Grindavík) - Olli miklum vonbrigðum í fyrra með Þrótti. Núna er hann kominn í Grindavík og það verður gaman að sjá hvort hann nái að losna alveg við meiðslin og sýna sínar bestu hliðar.

Danny Guthrie (Fram) - Langstærsta nafnið í þessari deild. Með fjölda leikja í ensku úrvalsdeildinni og er óvænt mættur í Fram. Það verður hrikalega gaman að sjá þennan leikmann í þessari deild.

Gary Martin (Selfoss) - Það verða alltaf augu á Gary Martin. Hann er kominn í nýtt lið og það verður gaman að sjá hversu hátt Selfoss getur farið með hann í liðinu. Það verða líka alltaf sögur í kringum hann.