Loksins standa yfir framkvæmdir á Laugardalsvelli en það var auðvitað brugðist of seint við. Þjóðarleikvangur okkar er svo sannarlega aftarlega á merinni í alþjóðlegum samanburði. Félagslið víða um Skandinavíu eiga mun betri leikvanga og fátækustu lönd Evrópu líka.

Loksins er allavega eitthvað að gerast á vallarfletinum sjálfum í Laugardalnum og fljótlega í kjölfarið verður svo vonandi byggð upp viðunandi aðstaða fyrir búningsklefa og áhorfendur. Við verðum að vera þjóð meðal þjóða.

Við þurfum ekki að horfa lengra en til Færeyja til að læra eitthvað en þar er leikvangur sem stenst allar kröfur sem til þarf. Í vinnuferðum mínum erlendis, sama hvort það sé til Moldóvu eða Lúxemborgar, hugsar maður alltaf 'Af hverju eigum við ekki svona völl?'.

Víkingur þarf að eyða tugum milljóna í að spilar erlendis þar sem UEFA og FIFA, sem eru algjörlega komin með upp í kok af því að veita Íslandi endalausar undanþágur. Vegna stöðunnar minnka líka möguleikar íslenska landsliðiðsins á að ná árangri, því komandi einvígi gegn Kosóvó verður spilað á hlutlausum velli í Murcia á Spáni á meðan andstæðingar okkar fá heimaleik.

Svo er það bara grafalvarleg staða að Íslendingar þurfi að ferðast erlendis til að geta séð „heimaleiki“ íslenskra íþróttaliða.

Ásthildur Lóa Þórsdóttir er nýr ráðherra íþróttamála og stendur vonandi við þau orð sín á dögunum að fylgja uppbyggingu íþróttamannvirkja fast á eftir. Vonandi fækkar fréttum um umsóknir um undanþágur, ódýr og léleg flóðljós sem standast ekki kröfur, sparnað við að byggja hálf íþróttahús í staðinn fyrir heil og tilgangslausa vinnuhópa og nefndir. Það þarf að láta verkin tala og gera þetta almennilega.