Valur endurheimti toppsætið í Pepsi Max-deild kvenna með nokkuð þægilegum sigri gegn Stjörnunni í kvöld.

Hlín Eiríksdóttir kom Val yfir strax á áttundu mínútu leiksins. „Þetta var ekki flókið! Hlín með boltann fyrir utan teig, hægra megin og bara laumaði boltanum fram hjá öllum og í vinstra hornið," skrifaði Brynja Dögg Sigurpálsdóttir í beinni textalýsingu.

Staðan var 1-0 í hálfleik og Stjarnan áfram inn í leiknum en það breyttist þegar leið á seinni hálfleikinn. Elín Metta Jensen kom Val í 2-0 á 67. mínútu og stundarfjórðungi síðar bætti Mist Edvardsdóttir við þriðja markinu.

Lokatölur 3-0 fyrir Val sem er með einu stigi meira en Breiðablik á toppi deildarinnar. Blikar eiga þó leik til góða. Stjarnan er í sjötta sæti með 14 stig, þremur stigum frá fallsæti.

Önnur úrslit:
Pepsi Max-kvenna: Blikar með flugeldasýningu á Akureyri