Jóhann Berg Guðmundsson var í byrjunarliði Burnley sem heimsótti Everton í síðasta leik fjórðu umferðar enska úrvalsdeildartímabilsins.

Staðan var markalaus eftir nokkuð jafnan fyrri hálfleik og tóku gestirnir úr Burnley forystuna í upphafi síðari hálfleiks, Ben Mee skallaði þá frábæra fyrirgjöf Jóhanns Bergs í netið.

Michael Keane var búinn að jafna sjö mínútum síðar þegar hann stangaði fyrirgjöf frá Andros Townsend í netið, en Townsend sjálfur kom Everton svo yfir skömmu síðar með stórkostlegu marki eftir frábært einstaklingsframtak. Hann kom inn af kantinum og lét vaða með frábæru skoti utan teigs.

Það leið rétt rúm mínúta þar til þriðja mark Everton leit dagsins ljós, í þetta skiptið var það Demarai Gray sem skoraði eftir frábæra stungusendingu frá Abdoulaye Doucoure. Staðan orðin 3-1 eftir að fjögur mörk litu dagsins ljós á tæpum stundarfjórðungi.

Leikurinn róaðist ekki niður heldur komu bæði lið knettinum aftur í netið en mörkin fengu ekki að standa vegna sóknarbrota. Bæði lið héldu áfram að leita að marki en inn vildi boltinn ekki og niðurstaðan góður 3-1 sigur Everton.

Everton klifrar upp að hlið Manchester United, Chelsea og Liverpool á toppi úrvalsdeildarinnar, einu stigi fyrir ofan Manchester City, Tottenham og Brighton.