Fabrizio Romano hefur tekið undir með spænskum fjölmiðlum sem segja Barcelona og Atletico Madrid vera í viðræðum um ansi merkileg félagaskipti.
Saúl Niguez, miðjumaður Atletico, er sagður á leið til Barcelona í skiptum fyrir frönsku stórstjörnuna Antoine Griezmann. Viðræður eru á góðum punkti en samkomulag næst ekki um kaupverð.
Barca vill fá pening með skiptunum en ólíklegt er að Atletico verði við þeirri beiðni. Griezmann er dýrari en Börsungar þurfa að losna við hann af launaskrá og er neyðin orðin ansi mikil þar á bæ.
Börsungar keyptu Griezmann fyrir tveimur árum fyrir 120 milljónir evra og gáfu honum risasamning. Griezmann er í dag launahæsti leikmaður Barcelona eftir að Lionel Messi tók á sig 50% launalækkun.
Hann hefur ekki staðið undir væntingum hjá Barcelona en er þó kominn með 35 mörk í 99 leikjum.
Athugasemdir