„Liðið gefur sig út fyrir að vera sóknarsinnað lið. Þeir vilja sækja á mörgum mönnum en þeir hafa skorað nítján mörk og eru með mínus einn í markatölu," sagði Gunnar Birgisson í Innkastinu í gær.

Víkingur stefndi á titilbaráttu fyrir mót en sú hefur ekki orðið raunin.

„KA, Grótta og Fjölnir eru einu liðin sem hafa skorað minna í deildinni en Víkingur. Það er sjokkerandi," sagði Elvar Geir Magnússon.

„Nikolaj Hansen hefur varla sést. Menn hefðu búist við fleiri mörkum frá Ágústi Hlyns þó að mér finnist hann reyndar þrefalt betri en í fyrra. Hann er ljós punktur í þessu Víkings liði en þetta er í raun bara Óttar Magnús Karlsson og co," sagði Gunnar.

Óttar Magnús hefur dregið vagninn í markaskorun Víkings en hann hefur skorað níu af nítján mörkum liðsins. Erlend félög vilja fá Óttar og Arnar Gunnlaugsson, þjálfari Víkings, segir tímaspursmál hvenær hann fer frá félaginu.

Hér að neðan má hlusta á Innkastið þar sem rætt var mikið um Víking og meðal annars hvort Arnar Gunnlaugsson sé of mikið að hugsa um að koma andstæðingnum á óvart.