Jói í leiknum í kvöld
Ísland tapaði 2-1 fyrir Sviss í Þjóðardeild UEFA á Laugardalsvelli í kvöld. Jóhann Berg Guðmundsson leikmaður liðsins sagði það vera mjög svekkjandi að lenda 2-0 undir gegn svona sterku liði og það hafi verið erfitt að ná því forskoti.
Lestu um leikinn: Ísland 1 - 2 Sviss
„Það er svekkjandi að lenda 2-0 undir þar sem við fáum á okkur tvö óþarfa mörk og svo auðvitað kom Alfreð okkur inn með þessu frábæra marki og við pressuðum þá stíft síðustu 10 mínúturnar en það dugði ekki til því miður."
Íslenska liðið sótti stíft síðustu mínúturnar og voru nálægt því að jafna leikinn og Jói sagði að þeir væru hundfúlir með að tapa þessum leik.
„Við vorum ansi nálægt því, við fengum frábæra sénsa og markmaðurinn gerði vel í að halda boltanum úr netinu en í lok dags þá töpum við leiknum og það er bara hundfúlt."
Jói segir markmiðið skýrt, þeir ætla sér að komast á Evrópumótið 2020 en nú verði liðið að byggja á þessar frammistöður í síðustu tveim leikjum og fara að vinna leiki.
„Nú er markmiðið að komast á næsta Evrópumót, frammistaðan er orðin miklu betri og við verðum að byggja ofan á það með að fara að vinna leiki. Við ætlum okkur að komast á EM 2020 en til þess að gera það þurfum við auðvitað að fara vinna leiki."
Athugasemdir
