England um helgina - Liverpool tekur á móti Man Utd

Lærisveinar Jose Mourinho í Tottenham eiga útileik við Watford í hádeginu á morgun. Rúmum hálftíma eftir leikslok fara sex aðrir leikir af stað.

Þar á meðal er heimaleikur Arsenal gegn Sheffield United sem verður sýndur á Sjónvarpi Símans líkt og tíðkast hefur með laugardagsleikina sem hefjast klukkan 15:00.

Á sama tíma eiga Englandsmeistarar Manchester City heimaleik við Crystal Palace á meðan David Moyes og Carlo Ancelotti eigast við á Upton Park.

Moyes, sem er nýlega tekinn við West Ham, mætir þar sínum gömlu vinnuveitendum í Everton sem eru búnir að spila undir stjórn Carlo Ancelotti í tæpan mánuð.

Newcastle og Chelsea eigast svo við í síðasta leik dagsins.

Á sunnudaginn gæti Jóhann Berg Guðmundsson tekið þátt í heimaleik Burnley gegn Leicester. Jói hefur verið mikið meiddur á tímabilinu en nýjustu meiðslin sem hann varð fyrir eru smávægileg. Burnley er búið að tapa fjórum leikjum í röð og þarf helst sigur til að forðast fallsvæðið.

Síðasti leikur helgarinnar og jafnframt sá stærsti er á dagskrá eftir að viðureign Burnley lýkur.

Liverpool á þar heimaleik við Manchester United, sem er eina liðið til að ná í stig gegn lærisveinum Jürgen Klopp það sem af er tímabils.

Laugardagur:
12:30 Watford - Tottenham (Síminn Sport)
15:00 Arsenal - Sheffield Utd (Sjónvarp Símans)
15:00 Man City - Crystal Palace
15:00 West Ham - Everton
15:00 Norwich - Bournemouth
15:00 Southampton - Wolves
15:00 Brighton - Aston Villa
17:30 Newcastle - Chelsea (Síminn Sport)

Sunnudagur:
14:00 Burnley - Leicester (Síminn Sport)
16:30 Liverpool - Man Utd (Síminn Sport)