Hreggviður Heiðberg Gunnarsson
Hreggviður Heiðberg Gunnarsson, fyrirliði Magna á Grenivík, segir að liðið geti verið stolt þrátt fyrir að vera úr keppni í Borgunarbikarnum.
Magni tapaði fyrir Gróttu í kvöld í 16-liða úrslitum Borgunarbikarsins, 3-2. Magni kom til baka í stöðunni 2-0 og jafnaði metin, en Grótta skoraði sigurmarkið undir lok leiksins.
Magni sigraði þrjú lið fram að 16-liða úrslitunum, þar á meðal nágranna þeirra í KA, en Hreggó var þó svekktur að vera úr leik.
,,Miðað við baráttuna í leiknum þá er þetta hrikalega svekkjandi. Náum að jafna metin manni færri og tveimur mörkum undir. Fáum á okkur svo mark beint í andlitið, þetta hefur verið svolítið svona í sumar, en það er ekki hægt annað en að vera stoltur af þessari baráttu," sagði Hreggviður.
,,Mér fannst allir 50-50 boltar hafa dottið þeirra megin í fyrri hálfleik. Mér fannst svo í rauða spjaldinu að maðurinn stígur bara í veg fyrir hann og það er svosem ekkert við þessu að að segja. Við vorum sterkari eftir það en kannski gerði hann okkur greiða. Bara óheppni að hann gerði þetta ekki fyrr í leiknum," sagði hann ennfremur.
Hægt er að sjá viðtalið í heild sinni hér að ofan.
