Sindri vann Einherja 4-1 í 2. deild kvenna í kvöld en Guðrún Ása Aðalsteinsdóttir gerði sér lítið fyrir og skoraði þrennu á tuttugu mínútna kafla.

Guðrún skoraði fyrsta markið á 4. mínútu og liðu aðeins sjö mínútur á milli áður en hún bætti við öðru. Hún fullkomnaði síðan þrennu sína á 24. mínútu. Mögnuð frammistaða.

Samira Suleman bætti við fjórða markinu í upphafi síðari hálfleiks áður en Oddný Karólína Hafsteinsdóttir náði sárabótamarki fyrir Einherja undir lokin.

Sindri er í 6. sæti með 12 stig en Einherji í 10. sæti með 6 stig.