Blackpool tilbúið að selja Daníel fyrir rétta upphæð

Daníel hefur lítið fengið að spila á tímabilinu og er það að hluta til vegna meiðsla. Hann fékk Covid á dögunum og missti af bikarleik á dögunum vegna veirunnar. Þar á undan hafði hann komið við sögu í þremur leikjum í röð, byrjað tvo af þeim og komið inn á í þeim þriðja.

Samningur hans við Blackpool rennur út í sumar og gæti hann þá farið frítt frá enska félaginu. Critchley vildi ekki tjá sig mikið um framtíð Daníels en sagði þó frá því að tilboð sem Blackpool gæti tekið hefði ekki borist til þessa.

„Allir leikmenn í okkar hóp og allir leikmenn hjá öllum liðum eru með verðmiða," sagði Critchley við Lancs Live.

„Daníel er okkar leikmaður og verður það þangað til eitthvað annað gerist, hann er með okkur og þannig er staðan. Ef einhver kemur með tilboð sem við teljum nægilega gott og Daníel vill skoða þá munum við eiga samtal um það. En til þessa hefur það ekki gerst," sagði Critchley.

Blackpool á leik gegn Millwall á morgun og má sjá stöðutöfluna hér að neðan.

Daníel er 26 ára og getur bæði spilað sem miðvörður og vinstri bakvörður. Hann kom inn í íslenska landsliðið á síðasta ári og spilaði 90 mínútur í báðum leikjum landsliðsins í nóvember.