Fjölskylda Lindelöf lenti í óhugnalegri lífsreynslu - Eiginkonan og börnin földu sig inni í herbergi

Eiginkonan, Maja Nilsson Lindelöf, hefur lýst því hvernig hún og börnin þeirra földu sig inni í herbergi.

„Við höfum það allt í lagi miðað við aðstæður en þetta var mjög erfið og óhugnaleg lífsreynsla fyrir mig og litlu börnin mín. Við vorum heima og földum okkur inni í herbergi áður en þeir náðu að brjótast inn," segir Maja. „Við erum núna komin til Svíþjóðar og erum hjá okkar nánustu."

Um jólin meiddist Joao Cancelo, varnarmaður Manchester City, þegar hann barðist gegn innbrotsþjófum sem fóru inn á heimili hans.

Lindelöf ekki með á morgun - Óvissa með Sancho
Lindelöf verður ekki með í mikilvægum deildarleik gegn West Ham á morgun laugardag þar sem hann mun verða í faðmi fjölskyldunnar eftir það sem átti sér stað.

„Victor sagði mér að hann þyrfti að vera með fjölskyldu sinni. Hann vill ekki yfirgefa konuna og börnin og ég skil það fullkomlega sem tveggja barna faðir sjálfur. Hann fékk frí á æfingu í dag og verður ekki með á morgun," segir Rangnick.

Þá gæti vængmaðurinn Jadon Sancho einnig misst af leiknum gegn West Ham en náinn fjölskyldumeðlimur hans féll frá á dögunum. Sancho var ekki með gegn Brentford vegna jarðarfararinnar.

Leikur Manchester United og West Ham verður klukkan 15:00 á morgun og er feikilega mikilvægur upp á baráttuna um fjórða sætið, Meistaradeildarsætið eftirsótta.