Bergsveinn varði meistaralega síðustu mínúturnar
Bergsveinn Ólafsson, varnarmaður Fjölnis í fyrstu deild karla, var allt í öllu í dag, en hann skoraði mark heimamanna og hélt þá hreinu er hann fór í markið síðustu mínútur leiksins í 2-1 sigri á Völsungi.
Bergsveinn þurfti að taka á sig að fara í markið síðustu fimmtán mínútur leiksins, en Steinar Örn Gunnarsson fór þá meiddur af velli eftir samstuð við Péter Odrobéna og þá var Fjölnisliðið búið með skiptingarnar.
,,Hreint lak og að setja hann gerist ekki oft hjá mér. Ég er mjög ánægður með þetta og hef alltaf dreymt um að fara í markið í leik og það kom ekki til greina að einhver annar væri að fara í markið en ég, það sást líka á vörslunum," sagði Bergsveinn.
,,Þessi fyrri hálfleikur var bara stál í stál og bæði lið að berjast. Það vantaði tíu eða tuttugu prósent hjá okkur í þetta, en seinni hálfleikur hafði upp á aðeins meiri skemmtun að bjóða, ef fyrri hálfleikur hefði verið eins og seinni hálfleikur þá hefði ég bara endurgreitt fólkinu."
,,Það var ekki séns. Ég vissi ekki að við vorum búnir með skiptingarnar, en Gunni talaði við mig og ég ætlaði allan tímann í markið og það var bara gott að ég gerði það. Ég gerði þetta einu sinni í B-liði í 3. flokk, en það voru bara tvær mínútur og frekar easy. Þetta reyndi smá á mig en maður var bara silkislakur þarna."
,,Ég var alltaf á battavellinum í gamla daga þegar við vorum að spila og ég var alltaf í markinu og mér fannst það skemmtilegast, lokaði oft rammanum og það hjálpaði mér í dag greinilega."
,,Ég hlýt að vera fyrsti maður inn í búrið og fáránlegt ef Gústi hendir mér ekki í búrið eftir þessa frammistöðu," sagði hann að lokum.
