Sveinn Aron heldur áfram að gera flotta hluti í bikarnum
Sveinn Aron Guðjohnsen hjálpaði sínum mönnum í Sarpsborg að komast áfram í undanúrslit norska bikarsins með því að skora í vítakeppni í sigri á Rosenborg í kvöld.
Framherjinn kom inn af bekknum í uppbótartíma síðari hálfleiks og spilaði alla framlenginguna.
Hann fékk síðan traustið í vítakeppninni og þakkaði fyrir sig með því að skora úr annarri spyrnu Sarpsborg sem endaði á því að vinna vítakeppnina, 4-2.
Ísak Snær Þorvaldsson var á bekknum hjá Rosenborg en kom ekkert við sögu.
Annar Íslendingaslagur var spilaður í bikarnum er Viking vann Álasund, 1-0.
Davíð Snær Jóhannsson og Ólafur Guðmundsson byrjuðu báðir hjá Álasundi á meðan Hilmir Rafn Mikaelsson var ónotaður varamaður hjá Viking.
Viking mætir Sarpsborg í undanúrslitum en Lilleström og Kristiansund mætast í hinum leiknum.
Athugasemdir
