Óskar Hrafn Þorvaldsson og KR-ingar eru í draumalandi með fullt hús stiga á toppi Bestu deildar karla eftir að hafa unnið FH, 4-2, í 4. umferð deildarinnar á Meistaravöllum í kvöld.

Mikið flæði hefur verið á KR í byrjun tímabils og mátti sjá á undirbúningstímabilinu hvað væri í vændum hjá þeim.

Aron Sigurðarson, fyrirliði liðsins, var með stórar yfirlýsingar á síðasta tímabili, og sagði ekkert því til fyrirstöðu að KR myndi taka yfir íslenskan fótbolta og sá ætlar að standa við stóru orðin.

Hann kom KR í forystu á 6. mínútu eftir klaufagang í vörn FH-inga þar sem Róbert Hugi Sævarsson ákvað að tvöfalda á Amin Cosic, sem fann Luke Rae og þaðan á Aron sem skoraði örugglega.

Tveimur mínútum síðar svöruðu FH-ingar eftir hornspyrnu. Boltinn datt fyrir Tómas Orra Róbertsson sem setti boltann í netið eftir smá darraðardans.

Á næstu tuttugu mínútum gerðu KR-ingar út um leikinn með þremur mörkum. Eiður Gauti Sæbjörnsson skoraði markið sem Jóhannes Karl Guðjónsson, þjálfari FH, var ósáttur með. Aron Sig togaði í peysu andstæðingsins, en hagnaðarreglunni beitt áður en FH tapaði boltanum. Aron sendi því næst Eið í gegn sem setti boltann fram hjá Jökli Andréssyni í markinu.

Amin Cosic og Aron bættu við tveimur mörkum á fimm mínútum. Amin fékk stungusendingu frá Gabríel Hrannari Eyjólfsson og setti boltann í netið úr þröngu færi áður en Aron Sig gerði fjórða markið.

Orri Hrafn Kjartansson, sem kom inn fyrir meiddan Arnór Ingva Traustason, átti stoðsendinguna á Aron sem skaut föstu skoti í netið.

FH-ingar minnkuðu muninn með öðru marki Tómasar undir lok fyrri hálfleiks. Baldur Kári Helgason slapp í gegn, sendi boltann á Tómas sem þurfi ekki annað en að renna boltanum í netið.

Staðan í hálfleik 4-2 fyrir KR sem hefði hæglega getað fleiri mörk í síðari hálfleiknum.

Amin fékk tvö dauðafæri til að skora og Stefán Árni Geirsson eitt færi en KR-ingar gátu bara ekki skorað fleiri mörk. Þeir ganga þó sáttir frá þessum leik. Magnaður sóknarleikur og fjórði sigurinn í röð.

KR er með 12 stig á toppnum en FH-ingar með aðeins eitt stig úr fjórum leikjum og áhyggjurnar aukast í Krikanum.