Katla skoraði og lagði upp í lokaumferðinni
Katla Tryggvadóttir skoraði og lagði upp í 2-1 sigri Fiorentina á Lazio í lokaumferð Seríu A á Ítalíu í dag.
Katla var ekki með Flórensarliðinu í síðustu umferð en kom beint inn í byrjunarliðið gegn Lazio.
Hún skoraði á 30. mínútu er hún fékk boltann í teignum, sneri sér við og hamraði honum á milli fóta hjá markverði Lazio og þá lagði Katla upp annað markið fyrir Sofie Bredgaard sem skoraði með stórglæsilegu skoti fyrir utan teig í síðari hálfleiknum.
Frábær frammistaða hjá Kötlu sem fór síðan af velli þa 84. mínútu leiksins. Hlín Eiríksdóttir og Íris Ómarsdóttir voru einnig í byrjunarliðinu en fóru af velli í seinni hálfleik.
Fiorentina hafnaði í 4. sæti deildarinnar með 36 stig.
