Haraldur Freyr Guðmundsson, þjálfari Keflavíkur.
Stefan Ljubicic átti ekki alveg sinn besta dag fyrir framan markið.
„Mér fannst við byrja leikinn vel og fyrri hálfleikurinn var heilt yfir vel spilaður hjá okkur. Við skorum eitt gott mark og vorum ofan á, en í seinni hálfleik jafna þeir snemma úr horni og það var gusa í andlitið," sagði Haraldur Freyr Guðmundsson, þjálfari Keflavíkur, eftir 1-1 jafntefli gegn Stjörnunni í Bestu deildinni í kvöld.
Lestu um leikinn: Keflavík 1 - 1 Stjarnan
Keflvíkingar spiluðu vel í leiknum og fengu sannarlega færi til að klára þetta.
„Mér fannst við vera með nokkuð góð tök á þessu. Svo kemur bara horn. Þeir eru sterkir í föstum leikatriðum og eru með gott lið. Þeir eru búnir að tapa fjórum í röð og seldu sig dýrt hérna. Kannski er jafntefli sanngjörn niðurstaða."
„Það er jákvætt að við séum að skapa færi. Stundum vill hann bara ekki inn. Ef við höldum svona áfram þá hljóta stigin að koma í kjölfarið."
Keflavík hefur ekki enn unnið á heimavelli en HS Orku völlurinn á að vera gryfja fyrir þá. „Ekki meiri gryfja en það að við höfum ekki unnið leik hérna í fyrstu þremur heimaleikjunum. Það hlýtur að koma að því."
Stefan Alexander Ljubicic fékk mörg færi fyrir framan markið en þetta var ekki alveg hans dagur. Hann þarf ekki að taka neinar aukaæfingar til að klára færin. „Hann þarf að halda áfram því sem hann er að gera og boltinn dettur inn næst."
Ljubicic er stór og stæðilegur sóknarmaður en það er mikið togað og ýtt í hann. „Ég get verið sammála með það. Mér finnst flestir fá að komast upp með mikið á móti honum, toga í hann og halda utan um hann. Það eru kannski Keflavíkurgleraugun sem ég horfi á það með, en mér finnst hann eiga að fá fleiri aukaspyrnur."
Allt viðtalið er í spilaranum hér að ofan þar sem Haraldur Freyr ræðir meira um byrjunina á mótinu.
