„Það er ekki hægt að vinna sætari sigra en þetta. Við fengum að smakka á því að vera á vitlausum endanum seinustu helgi. Við náðum að vera á réttum endanum núna, það er töluvert sætara.“ sagði Hólmar Örn Eyjólfsson, fyrirliði Vals, eftir dramatískan 3-2 sigur á Breiðabliki í kvöld.
Lestu um leikinn: Valur 3 - 2 Breiðablik
Sigurmark Vals kom alveg í blálokin, alvöru flautumark úr lokaspyrnu leiksins.
„Tilfinningin var bara geggjuð þegar ég sá boltann í netinu. Ég held að það sjáist bara hjá okkur öllum þarna. Ég á eftir að sjá þetta aftur og skoða hvernig þetta endar inni en bara virkilega sætt.“
Afhverju koma Valsmenn ekki jafn góðir út í seinni hálfleikinn og þeir voru í þeim fyrri?
„Við vorum mjög passívir þegar við komum út í seinni hálfleikinn. Það vantaði orku í liðið okkar, við vorum langt frá mönnum og hleyptum þeim alltof langt inn á okkar vallarhelming án þess að vera með pressu á þeim. Fáum svo mörkin í andlitið. Svo var þetta bara borðtennis í lokin þar sem bæði lið voru að reyna að sækja sigurinn, bara virkilega ánægður með karakterinn hjá okkur að sigla þessu heim, sérstaklega á þennan hátt að berja hann inn.“
Var sigurinn verðskuldaður hjá Valsmönnum?
„Já mér fannst það. Mér fannst í þeim köflum þegar við vorum að verjast gera það vel og svo sköpuðum við fullt af stöðum sem við fórum illa með. Þeir voru kannski meira með boltann en það er hægt að vinna fótboltaleiki á fleiri vegu en að halda í boltann.“
Viðtalið við Hólmar í heild sinni má finna í spilaranum hér að ofan.
