Þór tapaði gegn ÍA á Akureyri í Bestu deildinni í dag. Fótbolti.net ræddi við Sigurð Heiðar Höskuldsson, þjálfara Þórs, eftir leikinn.
Lestu um leikinn: Þór 1 - 2 ÍA
„Fyrri hálfleikurinn hörmung frá A-Ö. Seinni hálfleikurinn aðeins skárri en heilt yfir hræðileg frammistaða. Ég hef greinilega ekki náð að trekkja mannskapinn nægilega vel upp í þann bardaga sem var hérna í dag," sagði Siggi.
„Fókuslevelið, enginn tók ábyrgð, unnum aldrei fyrsta bolta, einn og einn seinni bolta á móti liði sem var að koma úr 120 mínútum í miðri viku, alltof linir. Ég þarf fara í smá naflaskoðun hvernig ég nálgast næstu leiki. Ég vona að það muni ganga og ég ef trú á því. Fyrir mér er brotlending í dag að fá alla þessa sénsa og ná ekki að skora og búa til fleiri færi. Við erum alltaf í séns öðru megin og þá fáum við víti eða mark á okkur í smettið. Það er ofboðslega sárt og lélegt og lélegt af mér að vera ekki búinn að koma því í lag."
Siggi verður áhyggjufullur ef ekkert breytist.
„Ég er áhyggjufullur ef við ætlum ekki að þora að snerta andstæðinginn og ef við ætlum ekki að þora að stíga í þá og vinna návígin okkar, þá er ég mjög áhyggjufullur. Svo þurfum við að gera betur á síðasta þriðjungi, komast í betri færi og skora fleiri mörk úr þessum færum sem við erum að fá. Ég er ekkert áhyggjufullur yfir því að við verðum svona lélegir út tímabilið eins og í dag. En það þarf að vera rosaleg breyting á liðinu í næstu leikjum," sagði Siggi
