Jóhannes Karl var heldur betur ósáttur eftir leik þegar Fótbolti.net ræddi við hann.
Lestu um leikinn: FH 1 - 2 KA
„Þetta var mjög svekkjandi þar sem að við héldum þeim ansi mikið í skefjum og gerðum þeim erfitt fyrir þá að komast í átt að markinu okkar í marktækifæri". sagði svekktur þjálfari FH-inga.
„Ég er nokkuð viss um að okkar marktækifæri í seinni hálfleik hafi verið hættulegri heldur en þeirra. Miðað við vinnuna sem strákarnir voru tilbúnir að leggja á sig hérna í dag, þá er þetta svekkjandi niðurstaðan. Að sama skapi er margt til fyrirmyndar hjá strákunum í dag, karakter, hugarfar og frammistaðan heilt yfir".
FH hafa alls ekki byrjað þetta tímabil vel og hafa ekki ennþá unnið leik.
„Hún hefur verið alveg upp og niður. Frammistöðurnar hafa að einhverju leyti verið góðar úti á móti Breiðablik, fyrri hálfleikur á móti Fram hérna á heimavelli, gerðum við fína hluti þar, sköpuðum tækifæri, skoruðum mörk".
„Dagurinn í dag var bara flottur að ansi mörgu leyti. Við vorum að reyna að spila fótbolta, vorum að reyna að spila á réttum stöðum og á köflum að reyna að komast aftur fyrir vörn KA-manna sem eru bara með ansi vel mannað lið, þannig að upp og niður. Það er að skapast ansi góður andi í þessum leikmannahóp og við erum bara að fara að setja frammistöðurnar saman, en þetta féll ekki með okkur í dag".
Framtíð Jóhannesar Karls hefur verið í umræðunni að undanförnu. Spurning hvort það sé farið að trufla Jóa Kalla eitthvað?
„Ég var náttúrulega ráðinn hérna til þess að hérna leiða þetta verkefni sem að varðar stefnuna sem var ákveðið að fara í og fylgja eftir. Ég er ekki að spá í pressu eða, ég veit að það er pressa, ég er búinn að vera í fótbolta, atvinnufótbolta í 30 ár eða eitthvað".
„Ég veit alveg að það er gríðarleg pressa alltaf í fótbolta og það er það sem að gerir hann náttúrulega spennandi. Stuðningsmenn FH hafa allan rétt á því að hafa skoðanir á hlutunum og þeir eru náttúrulega að styðja við bakið á liðinu sínu og hér eru öflugir stuðningsmenn. Þeir hafa rétt á sinni skoðun, og ég ber bara virðingu fyrir því en ég held ótrauður áfram, alveg sama hvað". sagði Jói Kalli að lokum.
