Lék sem miðvörður í dag.
'Það skiptir gríðarlega miklu máli að vera með svona leikmann í standi.'
'Ég gæti ekki verið stoltari af bróður mínum sem er gjörsamlega að brillera í þessum bransa'
„Þungu fargi af manni létt, held að það sé svona besta lýsingarorðið yfir þetta. Við erum ekki búnir að vinna sjö leiki í röð og þetta verður andlega þungt. Þetta var ekki besti leikurinn okkar í dag, erum búnir að spila flestalla leikur betur en í dag. Þetta snerist bara um að vinna, koma okkur aftur á beinu brautina," sagði fyrirliði Fylkis, Ragnar Bragi Sveinsson, eftir sigur á Völsungi í Lengjudeildinni í dag.
Ragnar Bragi leysti stöðu miðvarðar í fjarveru Orra Sveins Segatta í hjarta varnarinnar.
Ragnar Bragi leysti stöðu miðvarðar í fjarveru Orra Sveins Segatta í hjarta varnarinnar.
Lestu um leikinn: Völsungur 1 - 4 Fylkir
„Það er mjög auðvelt að spila hafsent, búinn að segja þetta við Geira (Ásgeir Eyþórsson) og Orra í mörg ár, þú hreyfir þig varla og ert bara að dunda þér eitthvað með boltann. Það var bara fínt, fínt að leysa það þar sem Orri var meiddur."
Emil Ásmundsson kom að fyrstu tveimur mörkum Fylkis. Hann er kominn af stað eftir hnémeiðsli. „Topp-toppleikmaður hann Emil, því miður misstum við hann út rétt fyrir mót, hann var kominn í svaðalega gott stand í vetur. Það skiptir gríðarlega miklu máli að vera með svona leikmann í standi."
Ætluðuð þið að vinna eða þurftuð þið að vinna?
„Sama hvort það sé ætluðum eða þyrftum, mig langaði bara að vinna þennan leik. Ég fæ meira bögg af því ég bý í Árbænum og hitti Árbæinga á hverjum degi í Bónus og fleira, það er búið að vera aðeins þungt yfir mannskapnum. Ég ætlaði að vinna þennan leik og mér fannst ég aðeins þurfa það líka."
Bróðir Ragnars Braga, Konráð Valur Sveinsson, setti í dag heimsmet í 250 metra skeiði. Fyrirliðinn var spurður út í afrek bróður síns.
„Ég var bara að sjá þetta þegar ég kom inn í klefa, maður er ótrúlega stoltur af honum. Hann er á sér sviði í þessari grein innan hestamennskunnar. Ég gæti ekki verið stoltari af bróður mínum sem er gjörsamlega að brillera í þessum bransa. Fáránlega gaman að sjá að hann sló þetta heimsmet í dag, geri aðrir betur."
Konráð og hesturinn hans voru 21,06 sekúndur að fara 250 metrana.
„Ég á tíma í þessu, hef keppt í þessu, mig minnir að ég hafi farið 23,11, munar um tveimur sekúndum, hann er aðeins betri en restin."
„Ótrúlegt að sjá hann ná þessum árangri, það hefur verið tröppugangur hjá honum. Hann á annað heimsmet í annarri grein (150m skeið). Þessi hestur sem hann er með er ótrúlegur. Ég veit ekki hversu mikið af fótboltamönnum skilja nákvæmlega um hvað hestamennskan snýst, en þetta er mjög einfalt, þú ert bara að keppa við tímann, spretthlaup á hesti. Hann er ótrúlegur, algjörlega sér á báti og á þetta fyllilega skilið," sagði Ragnar Bragi.
Smelltu hér til að lesa meira um afrek Konráðs
