Þau lið sem hafa verið nefnd í umræðunni eru KA, Stjarnan, ÍA og HK í efstu deild. Þessi lið hafa verið nefnd í dag og voru nefnd í hlaðvarpsþættinum Dr. Football í gærkvöldi. Í næstefstu deild voru Selfoss og Vestri nefnd til sögunnar. Talið er að Kórdrengir hafi ekki áhuga á Gary.

Í hlaðvarpsþættinum var rætt um þennan brottrekstur. „Var ekki hægt að klára þetta mál inn á skrifstofu félagsins?" spurði Hörður Snævar Jónsson sem þekkir ágætlega til í Vestmannaeyjum og er ritstjóri 433.is.

„ÍBV mun fyrst og fremst blæða fyrir þetta. Þeir eru ekki að fara finna senter á þessu kaliberi, deildin byrjar eftir viku og þó svo þeir losni aðeins við launagreiðslur," sagði Kristján Óli Sigurðsson.

„Gary finnst á sér brotið og mun láta hart mæta hörðu í þessu máli," sagði Hörður. „Ég talaði við menn í dag og ég held að stærsti hluti leikmannahóps ÍBV sé mjög ósáttur hvernig þetta mál hefur þróast."

„Þetta er mjög erfitt fyrir ÍBV, það eru tengsl þarna inn í stjórnina og þjálfarateymið sem gerir málið ennþá flóknara," bætti Hörður við.

„Mér finnst lélegast hvernig stjórn félagsins tæklar þetta mál. Þeir áttu að taka þessa menn saman á einhvern fund þar sem málin eru 'clearuð' og menn fara út og einbeita sér að fyrsta leik," sagði Stjáni.

„Núna er öll athyglin komin á þennan leikmann og allir munu fylgjast með honum í fyrstu leikjunum. Þetta er íslenskur fótbolti í hnotskurn í litlu bæjarfélagi. Það er alveg hægt að benda á ÍBV en ég held að Gary þurfi einnig að líta í eigin barm," sagði Hjörvar Hafliðason.

Umræðuna í heild sinni má nálgast í upphafi nýjasta Dr. Football þáttarins.

Óli Jóh segir að Gary myndi ekki nýtast KA
Þeir Arnar Grétarsson, þjálfari KA, og Jóhannes Karl Guðjónsson, þjálfari ÍA, voru spurðir í dag hvort það komi til greina að fá Gary til félagsins.

Miðað við svar Jóa Kalla í Innkastinu þá verður að teljast ólíklegt að Gary fari til ÍA. Arnar Grétarsson sagði þá í gær að KA hefði ekki skoðað að fá Gary. Arnar var spurður skömmu eftir að ljóst var að Gary hefði verið rekinn frá ÍBV.

Í kvöld birti Gary mynd af Pepsi Max-flösku á Instagram og er alveg hægt að túlka það sem einhverja vísbendingu um að hann vilji spila í efstu deild.

Ólafur Jóhannesson var sérfræðingur í upphitunarþætti Pepsi Max-stúkunnar í gærkvöldi og spurði Guðmundur Benediktsson Óla hvort að Gary myndi nýtast liði KA.

Óli þjálfaði Gary í skamman tíma hjá Val árið 2019 en upp kom ósætti og Gary fór til ÍBV í sumarglugganum. Óli svaraði einfaldlega að Gary myndi ekki nýtast KA-liðinu.

„Ég þjálfaði hann í stuttan tíma reyndar. Ég er mest ánægður með það að þurfa ekki að taka ákvörðun um það að hvort eigi að taka hann í KA eða ekki."

„Nei, ég segi bara nei," sagði Óli.