Helgi Sigurðsson þjálfari ÍBV
Í annað sinn á 17 dögum þurfti ÍBV að sætta sig við 3-1 tap gegn toppliði Keflavíkur í Lengjudeildinni er liðin mættust á Nettóvellinum í dag. Tapið gerir því sem næst út um tölfræðilega möguleika ÍBV á því að vinna sér sæti í Pepsi Max að ári en 9 stig skilja þá að frá liði Fram sem sitja í öðru sæti deildariinar þegar 3 umferðum er ólokið.
Lestu um leikinn: Keflavík 3 - 1 ÍBV
„Við vorum að spila ágætlega á köflum og vorum að skapa okkur fín færi en þeir refsuðu okkur grimmilega og þar við sat. Hundfúlt því menn voru að leggja mikið í þetta.“
Sagði Helgi Sigurðsson þjálfari ÍBV við fréttaritara að leik loknum.
Eyjamenn voru betri aðilinn framan af í leiknum og stjórnuðu flæði leiksins í fyrri hálfleik ásamt því að skapa sér ágæt færi. Lukkan var þó ekki á bandi gestanna í dag.
„Það er meiri lukka hjá liðum sem gengur vel en engu að síður ætluðum við að koma hingað og sýna okkar rétta andlit. Mér fannst við gera það mjög vel í fyrri hálfleik. Svo fyrstu 10 í seinni hálfleik fórum við með þetta og þá var á brattann að sækja,“
Möguleikar ÍBV á sæti í Pepsi Max að ári eru líkt og áður segir að engu orðnir. Hver eru markmið ÍBV fram að mótslokum?
„Við erum ÍBV og förum í hvern leik til þess að vinna. Við eigum eftir 3 leiki í deildinni og svo eru undanúrslit í bikar við eigum bara að halda áfram og ekki láta þetta hafa of mikil áhrif á okkur þó við séum hundfúlir í dag.“
Sagði Helgi en viðtalið má sjá hér að ofan.
Athugasemdir
