Fyrrum þjálfari Ruben Dias telur að varnarmaðurinn geti fyllt það skarð sem Vincent Kompany skildi eftir sig hjá Manchester City.
Hinn 23 ára gamli Dias skrifaði í gær undir sex ára samning við Manchester City. Hann kemur frá Benfica fyrir um 60 milljónir punda.
Kompany var mikill leiðtogi hjá Man City en hann yfirgaf félagið í fyrra. Joao Tralhao þjálfaði Dias þegar hann var yngri og hann telur að miðvörðurinn geti fyllt í það skarð sem Kompany skildi eftir.
„Hann var fyrirliði í öllum aldursflokkum vegna þess að hann er náttúrulegur leiðtogi," sagði Tralhao við Sky Sports.
„Hann vill leiða lið áfram og hann veit hvernig á að gera það. Hann veit hvernig hann getur verið rödd þjálfarans inn á vellinum og í búningsklefanum. Hann veit allt um það hvernig það á að vera leiðtogi."
„Þið munuð sjá það hjá City þegar hann er búinn að aðlaga sig."
Athugasemdir