Leikjaniðurröðin og dagsetningar á leikjum Víkings í Sambandsdeild Evrópu hefur verið opinberuð og staðfest en liðið hefur leik gegn Omonoia á Kýpur.
Víkingar tryggðu sig í fyrsta sinn í lokakeppni í Evrópumóti á fimmtudag er liðið vann samanlagðan 5-0 sigur á Santa Coloma í umspili.
Dregið var um andstæðinga í gær og kom þá í ljós að Víkingur mætir Omonoia, Cercle Brugge, LASK Linz, Borac, Noah og Djurgården.
Leikjaniðurröðunin var síðan kláruð í dag og mun Víkingur hefja keppni á útivelli gegn Omonoia frá Kýpur. Leikurinn fer fram 3. október á GSP-leikvanginum.
Fyrsti heimaleikurinn er gegn Cercle Brugge þann 24. október en ekki er ljóst á hvaða velli Víkingar munu spila. Laugardalsvöllur verður mögulega ekki klár, en þó kemur til greina að spila á Lambahagavellinum í Úlfarsárdal eða á Kópavogsvelli.
Leikjadagskrá Víkinga:
Omonoia - Víkingur (3. október)
Víkingur - Cercle Brugge (24. október)
Víkingur - Borac (7. nóvember)
Noah - Víkingur (28. nóvember)
Víkingur - Djurgården (12. desember)
LASK - Víkingur (19. desember)
Leikjaniðurröðun og dagsetningar á leikjum Víkings í deildarkeppni Sambandsdeildar Evrópu er staðfest! Takið frá þessa daga og helst nokkra daga á undan og á eftir. Við byrjum á að skella okkur til Kýpur þar sem við mætum Omonoia frá borginni Nicosia. #EuroVikes pic.twitter.com/RKOcTVRIhJ
— Víkingur (@vikingurfc) August 31, 2024
Athugasemdir
