Ef rétt hugarfar, metnaður og barátta er til staðar eiga menn möguleika á því að komast ansi langt, sama þó náttúrulegir hæfileikar í þessari göfugu íþrótt hafi ekki verið til staðar. Það er meiraðsegja lið sem er í efri hluta ensku úrvalsdeildarinnar sem er byggt upp á leikmönnum sem teljast í þennan flokk. Í því liði fá „betri“ fótboltamenn að dúsa á bekknum á meðan bardagamenn og spjótkastarar láta ljós sitt skína.

Hermann Hreiðarsson er einn besti varnarmaður sem Ísland hefur átt, Gary Neville verður alltaf goðsögn hjá Manchester United og Jamie Carragher er í uppáhaldi á Anfield. Menn geta komist ansi langt á hörkunni.

Ef menn eru stútfullir af hæfileikum en hausinn er ekki að dansa með þá er ekki von á góðu. Allir sem þennan pistil lesa þekkja einhvern sem spáð var bjartri framtíð í boltanum en floppaði því rétta hugarfarið var ekki til staðar.

Tíðni óvæntra úrslita er mun hærri í fótbolta en flestum öðrum íþróttum. Reglulega ná áhugamenn að leggja atvinnumenn. Þó Real Madrid og Barcelona mætist í úrslitum spænska konungsbikarsins í ár hafa þessi lið oft fengið að kynnast því að vera í hlutverki Golíats gegn Davíð í þessari keppni. Með skipulagi, öguðum varnarleik og baráttu getur Davíð gert ótrúlega hluti í fótbolta. Hluti sem hann getur ekki gert í öðrum íþróttum.

Fótbolti.net er stærsta heimasíða landsins sem sérhæfir sig í umfjöllun um móður allra íþrótta. Með þessu pistlakerfi sem nú hefur verið tekið í notkun munu umræður og skoðanaskipti um fótbolta á síðunni aukast til mikilla muna. Menn úr ýmsum kimum fótboltans á Íslandi hafa tekið vel í að skrifa fyrir okkur hugleiðingar sínar og mun bætast enn frekar í þennan hóp á næstu vikum.

Góða skemmtun!