Stjarnan vann 3-1 sigur á Grindavík í B-riðli Fótbolta.net mótsins í Kórnum í gær. Á sunnudaginn tapaði Stjarnan illa 6-2 í æfingaleik gegn Víkingi Ólafsvík en Bjarni Jóhansson, þjálfari Garðabæjarliðsins, var með áhersluna á Grindavíkurleiknum.
„Það voru ekki margir sem spiluðu gegn Víkingi Ólafsvík að spila hér í kvöld. Það var gjörólíkt lið sem hljóp inn á völlinn í kvöld en á sunnudaginn," sagði Bjarni í viðtali eftir leikinn í gær.
Garðar Jóhannsson, markakóngur Pepsi-deildarinnar í fyrra, var í flottum ham í gær og skoraði tvö fyrstu mörk leiksins. „Garðar spilaði heilan leik og það er bara frábært. Hann afgreiddi þessi mörk mjög vel."
Dani veitti Garðari félagsskap í sókninni, sá ber nafnið Kennie Chopart og hefur æft með Stjörnunni síðustu dag.
„Mér lýst vel á hann. Ég sá hann í fyrra og við reyndum að fá hann þá en það gekk því miður ekki. Þetta er fljótur og sterkur strákur sem er fínn á boltann," sagði Bjarni en viðtalið við hann má sjá í heild í sjónvarpinu hér að ofan.
