Ian Jeffs þjálfari Breiðabliks var ánægður með frammistöðu liðsins eftir þægilegan sigur á Akureyri gegn Þór/KA.
Lestu um leikinn: Þór/KA 1 - 3 Breiðablik
Blikar klúðruðu dauðafærum í fyrri hálfleik og var staðan var markalaus í leikhlé en flóðgáttirnar opnuðust í síðari hálfleik. Agla María Albertsdóttir skoraði eitt og lagði upp tvö til að innsigla sigur.
„Mér fannst þetta ekki vera jafn fyrri hálfleikur, við áttum fullt af góðum færum og komumst tvisvar eða þrisvar einar gegn markmanni. Við hefðum átt að fara inn í hálfleikinn tvö eða þrjú núll yfir fannst mér," sagði Ian eftir leikinn.
„Við breyttum engu fyrir seinni hálfleikinn. Við héldum áfram að gera það sama og í fyrri hálfleik, bara nýttum færin aðeins betur."
Ian hrósaði kantmönnunum sínum sem sköpuðu mikinn usla með miklum hraða. Hann er ánægður með byrjun liðsins í Bestu deildinni enda eru Blikar með fullt hús stiga eftir fimm umferðir.
„Þetta er erfið deild, það eru tíu góð lið og maður þarf alltaf að vera 'on it' fyrir hvern einasta leik. Við erum bara að hugsa um okkur, við erum að reyna að bæta okkur og gera hlutina betur. Okkar fókus er bara þar."
