Andrea Rán Snæfeld Hauksdóttir bar fyrirliðabandið með stolti þegar FH vann sterkan 3-0 sigur á ÍBV.
FH sýndi styrk sinn og samstöðu þegar liðið lagði ósigrað ÍBV að velli, 3-0, í fimmtu umferð Bestu deildarinnar í kvöld.
Andrea Rán Snæfeld Hauksdóttir bar fyrirliðabandið í kvöld og var stolt af viðbrögðum liðsins en það var mikið áfall fyrir þær að missa Kötlu Maríu Þórðardóttur sem sleit krossbönd gegn Stjörnunni.
„Bara ánægð að halda hreinu, fyrst og fremst. Ég er bara ótrúlega stolt af stelpunum sem stigu upp þennan leik og að hafa skorað þrjú mörk,“ sagði Andrea eftir leik.
Lestu um leikinn: FH 3 - 0 ÍBV
FH konur fylgdu leikplaninu nánast fullkomlega að hennar sögn.
„Við bara fylgdum leikplaninu sem við lögðum upp fyrir leik bara rosalega vel og það gekk upp. Við héldum í boltann og vorum rólegar. Það gekk eiginlega allt upp sem við lögðum upp með.“
Mikið högg fyrir FH að missa Kötlu Maríu út tímabilið en Andrea segir hópinn hafa sameinast eftir fréttirnar.
„Það var náttúrulega ákveðið áfall fyrir allt liðið og ömurlegt að missa leikmann eins og Kötlu. Hún er bara leiðtogi í öllu og var bara búin að vera geggjuð. Ömurlegt að missa hana en aftur á móti þá stigu stelpurnar inn í þann stað fyrir Kötlu.“
„Okkur langaði svolítið að gera þetta fyrir Kötlu. Þessi leikur og þeir leikir sem munu koma, verða svolítið fyrir hana.“
Ungir leikmenn FH fengu stór hlutverk í kvöld og stóðu sig vel, þar á meðal þær Ingibjörg og Anna Heiða.
„Það er náttúrulega bara ótrúlega gott og ég treysti þeim bara vel fyrir það verkefni sem þær eru að fá. Það er ekki einfalt að koma inn og sérstaklega að fylla í skarðið fyrir Kötlu.“
„Við vitum að þetta er ekki einfalt en þær gerðu þetta bara ógeðslega vel og ég er sjúklega stolt af þeim. Þær eru bara að fara byggja ofan á þetta.“
Sjáðu viðtalið í heild í spilaranum hér fyrir ofan.
