Bikarmeistararnir eru úr leik eftir tap í Árbænum
„Þetta er fúlt. Að fá á sig eitt skot á markið og klikka á endalaust af dauðafærum og möguleikum á að skapa dauðafæri. Við vorum bara ekki á okkar degi í að slútta,“ sagði Þorsteinn Halldórsson, þjálfari Blika, er hann var inntur eftir viðbrögðum eftir 1-0 tap gegn Fylki í 16-liða úrslitum Mjólkurbikarsins. Þetta var fyrsti tapleikur Breiðabliks í sumar og ríkjandi bikarmeistarar úr leik í keppninni.
Blikum hefur gengið vel að skora það sem af er sumri en þrátt fyrir að hafa verið mun meira með boltann og náð að skapa sér þónokkur færi gekk þeim grænklæddu illa fyrir framan Fylkismarkið.
„Öll slútt voru léleg nema slúttin sem fóru í markið og þá var alltaf rangstaða. Við erum að fá svakaleg færi í þessum leik. Komumst einar á móti markmanni og það er bara skotið beint í hana. Hún þurfti ekki einu sinni að skutla sér. Það er bara fúlt. Mér fannst leikmenn vera svolítið off í færum,“ sagði Steini sem vildi þó ekki meina að liðið sitt hefði vanmetið mótherjana.
„Mér fannst við vera að yfirspila þær allan leikinn. Við héldum boltanum ágætlega í fyrri hálfleik og sköpuðum fín færi. Mér fannst þetta ekki vera vanmat. Þetta er einn af þessum leikjum sem maður lendir í þar sem að hlutirnir ganga bara ekki upp fyrir framan markið. Það getur alltaf komið fyrir.“
Hægt er að sjá allt viðtalið við Steina í spilaranum hér að ofan.
Athugasemdir
