Björn Daníel Sverrisson, leikmaður FH í Pepsi-deild karla, var ánægður með 2-1 sigur liðsins á Fram í kvöld, en þá var einnig rætt um áhuga á honum erlendis frá.
,,Við byrjuðum ekkert sérstaklega vel í þessum leik, en þegar leið á leikinn þá fannst mér við vinna okkur inn í hann. Skoruðum fyrsta markið og þetta var klaufamark sem við fengum á okkur en sem betur fer náðum við sigurmarkinu," sagði Björn.
,,Þetta er ekkert í fyrsta sinn sem lið jafna á móti okkur og við höldum alltaf áfram og við þurftum þennan sigur í ljósi þess að KR hafi verið fimm stigum á undan okkur, svo þetta var mjög mikilvægt."
Frammistaða hans hefur ekki farið framhjá neinum í sumar, en mörg erlend lið eru að skoða hann. Hann er þó rólegur yfir þessu öllu saman og mun skoða hlutina ef tilboð berst í hann.
,,Ég hef ekki hugmynd um að það séu menn að horfa á mig, en það er gott að vita af því, þá vill maður gera betur en venjulega en það er fínt að það sé verið að skoða mann."
,,Ég bara veit það ekki, ef sá möguleiki kemur upp þá er vert að skoða það. Þegar maður er orðinn 23 ára, þá er áhugavert að fara út ef það kemur upp, en það verður skoðað ef það gerist," sagði hann að lokum.
Hægt er að sjá viðtalið í heild sinni hér að ofan.
