Kristján Guðmundsson
Kristján Guðmundsson, þjálfari Stjörnunnar, var ánægður með sigur liðsins á Fylki í Pepsi Max-deild kvenna í kvöld en liðið kom til baka eftir að hafa lent undir.
Lestu um leikinn: Fylkir 1 - 2 Stjarnan
Fylkir, sem hefur ekki enn unnið leik í sumar, komst yfir á 15. mínútu en Stjarnan hafði spilað fínan bolta í leiknum og kom það því ekki á óvart er liðið jafnaði á 38. mínútu.
Stjarnan var nálægt því að komast yfir áður en hálfleikurinn var úti en Betsy Doon Hassett sá til þess að Stjarnan tæki öll þrjú stigin með marki á 54. mínútu.
„Mér fannst hann skemmtilegur þannig séð. Það var töluvert af færum og mörg sláarskot en í fyrri hálfleik fannst mér við spila á köflum mjög vel, góðan fótbolta og þorðum að spila og sækja en eins og svo oft áður þá fáum við á okkur fyrsta markið en ég sá það á liðinu að það breytti ekki miklu nema það að þær stigu meira upp," sagði Kristján við Fótbolta.net.
Málfríður Erna Sigurðardóttir spilaði fyrsta deildarleikinn með Stjörnunni í kvöld og styrktist vörnin gríðarlega við það en hún gekk til liðs við Stjörnuna í september á síðasta ári.
„Hún var ekkert með okkur í vetur. Það stóð ekkert endilega til að hún myndi spila en nú hafa verið meiðsli á þremur varnarmönnum þannig við kölluðum á hana að aðstoða okkur í þessari hörku sem við stöndum í núna og hún svaraði kallinu."
„Ég er sáttur við varnarleikinn í öftustu línunni. Það opnaðist aðeins fyrir framan þær seinasta korterið og þær stóðust það álag en ég vildi að miðjan myndi loka betur fyrir þær."
Stjarnan er í sjötta sæti með sjö stig eftir fyrstu sex leikina en Kristján segir að liðið eigi töluvert inni og að spilamennskan hafi sýnt það í sumar.
„Samkvæmt tölfræðinni eigum við stig inni. Ég get alveg verið sammála því. Við höfum verið að spila marga leiki mjög vel, þessi leikur spilaður á köflum rosalega vel. Við höfum þurft að hafa fyrir hlutunum í sumar en ég á von á því að við höldum áfram á sömu braut," sagði hann ennfremur en hægt er að sjá viðtalið í heild sinni hér fyrir ofan.
Athugasemdir
