Guðrún Arnardóttir.
Guðrún Arnardóttir, leikmaður íslenska landsliðsins, átti heldur betur frábæra viku en sú vika var fullkomnuð í dag þegar hún var valin leikmaður mánaðarins í sænsku úrvalsdeildinni.
Rosengård, liðið sem Guðrún spilar fyrir, hefur byrjað frábærlega í sænsku úrvalsdeildinni á tímabilinu og er með fullt hús stiga eftir átta leiki í deildinni.
Liðið hefur bara fengið á sig tvö mörk í fyrstu átta leikjunum og þar spilar Guðrún stórt hlutverk. Rosengård fékk aðeins á sig eitt mark í fimm leikjum í maí.
Hlín Eiríksdóttir, sem skoraði þrjú mörk og gaf tvær stoðsendingar fyrir Kristianstad í maí, kom einnig til greina í þessu vali.
Guðrún átti frábæran leik með Íslandi gegn Austurríki síðasta þriðjudag og var henni líkt við Lionel Messi af liðsfélögum sínum eftir leikinn. Hún gerði frábærlega í fyrra marki Íslandi og sýndi óvænta sóknartakta.
„Markið sem við skoruðum, ég veit ekki hvað kom fyrir Guðrúnu, hún var allt í einu Messi," sagði Glódís Perla Viggósdóttir, landsliðsfyrirliði, við Morgunblaðið eftir leikinn og var vel hægt að taka undir það.
Guðrún, sem er 28 ára, hefur spilað 39 A-landsleiki og skorað í þeim eitt mark.
Athugasemdir
