Varnarmenn Man City komu liðinu í tveggja marka forystu í fyrri hálfleiknum.

Portúgalinn Ruben Dias skoraði algert draumamark á 31. mínútu með þrumufleyg fyrir utan teig. Minnti svolítið á Vincent Kompany gegn Leicester um árið.

Josko Gvardiol bætti við öðru fjórum mínútum síðar með skalla eftir hornspyrnu Phil Foden og þá komst Foden sjálfur á blað eftir stórkostlega Rabona-fyrirgjöf Rayan Cherki hálftíma fyrir leikslok.

Luke O'Nien, leikmaður Sunderland, sá rauða spjaldið undir lok leiks aðeins nokkrum mínútum eftir að hafa komið inn á sem varamaður.

Fagmannleg frammistaða hjá Man City sem er komið aftur upp í annað sætið með 31 stig, nú aðeins tveimur stigum frá toppliði Arsenal.

Tottenham vann 2-0 sigur á Brentford í Lundúnum. Xavi Simons, sem hefur átt erfitt uppdráttar hjá Tottenham, var aðalmaðurinn með mark og stoðsendingu.

Hann lagði upp fyrir Richarlison á 25. mínútu sem gat ekki annað en skorað úr teignum og þá bætti Simons við öðru á 43. mínútu eftir glæsilegt hlaup.

Tottenham flaug upp í 8. sæti deildarinnar með 22 stig en Hákon Rafn Valdimarsson og félagar í Brentford í 14. sæti með 19 stig. Hákon sat allan tímann á varamannabekknum.

Bruno Guimaraes, fyrirliði Newcastle United, skoraði beint úr hornspyrnu í 2-1 sigri liðsins á Burnley.

Markið skoraði hann á 31. mínútu. Boltinn flaug yfir alla og þar á meðal Martin Dubravka, fyrrum liðsfélaga hans í Newcastle, og í netið.

Undir lok hálfleiksins sá Lucas Pires rauða spjaldið fyrir tæklingu á Anthony Elanga sem var að sleppa í gegn og stuttu síðar fengu heimamenn vítaspyrnu þegar leikmaður Burnley handlék boltann í teignum.

Anthony Gordon skoraði markið en Burnley-menn fengu vítaspyrnu á hinum endanum í lok leiks sem Zian Flemming skoraði úr. Þriðji deildarsigur Newcastle í síðustu fjórum leikjum og liðið nú í 10. sæti með 22 stig en Burnley í næst neðsta sæti með 10 stig.

Bournemouth og Chelsea gerðu markalaust jafntefli á Vitality-leikvanginum.

Liðin skiptust á færum en Chelsea var töluvert meira með boltann.

Alejandro Garnacho átti tilraun í tréverkið snemma í síðari hálfleiknum og þá fékk Antoine Semenyo einnig gott tækifæri til að skora undir lokin fyrir heimamenn.

Jafntefli var hins vegar niðurstaðan. Chelsea er í 4. sæti með 25 stig en Bournemouth í 13. sæti með 20 stig.

Everton vann þá 3-0 sigur á Nottingham Forest þar sem Thierno Barry skoraði sitt fyrsta mark fyrir þá bláu.

Nikola Milenkovic varð fyrir því óláni að koma boltanum í eigið net á 2. mínútu og gerði Barry fyrsta mark sitt eftir frábæra sókn í uppbótartíma fyrri hálfleiks.

Kiernan Dewsbury-Hall gulltryggði Everton sigurinn á 80. mínútu og skaut sínum mönnum í 5. sæti deildarinnar með 24 stig en Nottingham aðeins þremur stigum fyrir ofan fallsæti.

Newcastle 2 - 1 Burnley
1-0 Bruno Guimaraes ('31 )
2-0 Anthony Gordon ('45 , víti)
2-1 Zian Flemming ('90 , víti)
Rautt spjald: Lucas Pires, Burnley ('43)

Tottenham 2 - 0 Brentford
1-0 Richarlison ('25 )
2-0 Xavi Simons ('43 )

Manchester City 3 - 0 Sunderland
1-0 Ruben Dias ('31 )
2-0 Josko Gvardiol ('35 )
3-0 Phil Foden ('65 )
Rautt spjald: Luke O'Nien, Sunderland ('90)

Everton 3 - 0 Nott. Forest
1-0 Nikola Milenkovic ('2 , sjálfsmark)
2-0 Thierno Barry ('45 )
3-0 Kiernan Dewsbury-Hall ('80 )

Bournemouth 0 - 0 Chelsea