Juventus hefur verið að upplifa hörmulegar vikur undir stjórn Luciano Spalletti.

Liðið datt úr leik í ítalska bikarnum og Meistaradeildinni og hafði ekki unnið í síðustu þremur deildarleikjum. Sigurinn kom að vísu ekki í kvöld en liðið sýndi frábæran karakter gegn Roma.

Tvisvar komst Roma yfir í leiknum. Vængbakvörðurinn Wesley skoraði á 39. mínútu en Francisco Conceicao jafnaði snemma í þeim síðari.

Miðvörðurinn Evan Ndicka kom Roma aftur yfir á 54. mínútu og þá hélt Donyell Malen áfram í fantaformi er hann tvöfaldaði forystu heimamanna.

Juventus lagði ekki árar í bát heldur kom til baka með tveimur mörkum á síðasta stundarfjórðungi leiksins. Jeremie Boga minnkaði muninn á 78. mínútu áður en Federico Gatti jafnaði metin undir lok leiks.

Sterk endurkoma hjá Juventus sem er í 6. sæti með 47 stig en Roma í 4. sæti með 51 stig.

Torino vann Lazio, 2-0, á heimavelli. Giovanni Simeone og Duvan Zapata skoruðu mörkin.

Atalanta tapaði þá óvænt á móti tíu leikmönnum Sassuolo, 2-1.

Framherjinn Andrea Pinamonti sá rauða spjaldið í liði Sassuolo á 16. mínútu leiksins, en manni færri varð liðið enn betra. Ismael Kone skoraði á 23. mínútu og bætti Kristian Thorstvedt við öðru marki tuttugu mínútum fyrir lok venjulegs leiktíma.

Yunus Musah minnkaði muninn undir lok leiks en fleiri urðu mörkin ekki og lokatölur því 2-1 Sassuolo í vil.

Úrslit og markaskorarar:

Torino 2 - 0 Lazio
1-0 Giovanni Simeone ('21 )
2-0 Duvan Zapata ('53 )

Roma 3 - 3 Juventus
1-0 Wesley ('39 )
1-1 Francisco Conceicao ('47 )
2-1 Obite Evan Ndicka ('54 )
3-1 Donyell Malen ('65 )
3-2 Jeremie Boga ('78 )
3-3 Federico Gatti ('90 )

Sassuolo 2 - 1 Atalanta
1-0 Ismael Kone ('23 )
2-0 Kristian Thorstvedt ('69 )
2-1 Yunus Musah ('88 )
Rautt spjald: Andrea Pinamonti, Sassuolo ('16)

Smelltu hér til að kaupa áskrift að Livey